Headlines News :
Home » » Lopi Karodo (Cerpen Bahasa Bima)

Lopi Karodo (Cerpen Bahasa Bima)

Written By Pewarta News on Minggu, 19 Juni 2016 | 23.42

Agus Salim.
PewartaNews.com – Wara-waraku aipu zaman ma ntoina. Mori lalo mpara Ama Beto labo Ama Bengo. Ama beto ede ededu  Bote. Ama bengo ede ededu Bango. Dei sabua ainaina, rece lalo mpara ba Ama Beto Ama Bengo ede. Ededu ba lao ngaha kalo aka nggaro Ama Beto.
“Oe Ama Bengo”. Nggahi Ama Beto.
“Io, Ama Beto e “. Cambe  ba Ama Bengo.
“Ti ca’u mu lao ngaha kalo aka nggaro nahu ro?”. Sodi ba Ama Beto.
“Ka ca’u ni”. Cambe ba Ama Bengo.

Edempara Ama Beto labo Ama Bengo ede. Lao ngaha sama kai na mpara kalo aka nggaro Ama Beto. Sawa’u kaiba nggori ngaha mena na kalo ede. Wontu lalompara mabani/na’e nawa Ama Beto ede aka Ama Bengo. Ndi wara kai wontu mbani/na’e nawa Ama Beto aka Ama Bengo ede, palasi ba  ra ngaha ka mpoi wea kalo na ba Ama Bengo. Edempara foco sara’a lalo wea ba Ama Beto kere Ama Bengo ede, hampasi da loa kai wea na ngemo.

“Ba auku wonto karaso kaimu kere nahu Ama Beto e?”. Sodi ba Ama Bengo, ma campo labo na’e nawa na.

“Sarase ra ngaha ka mpoimu kalo nahu ni!”. Cambe kai ba Ama Beto. Labo adena ma waura sana ba waura ntuki ra kania na. Ededu karaso wea na kere Ama Bengo ede.

Edempara Ama Bengo ede wontu wali na’e nawa na aka Ama Beto. Bunesi ntika wontu kai na’e nawa Ama Bengo aka Ama Beto ede, wati ra renta ba lera/rera na. Dei ade na’e kai nawa na Ama Bengo ede. Woko lalo mapara aka Ama Bengo ede. Ededu aka na ma ne’e cola rawi iha ama Beto aka wekina. Bunesi ntika aka ma woko dei ade tuta Ama Bengo ede. Ededu na receku Ama Beto lao ngaha sama jago ipa bae moti.
“Oe Ama Beto e”. Nggahi Ama Bengo.
“Ba au Ama Bengo e”. Cambe ba Ama Beto, ma labo sodi na.
“Wati ca’u mu lao nagha jago ipa bae moti ro?”. Sodi ba Ama Bengo.
“Ka ca’u  ni, bune aiku e?”. Sodi mbali ba Ama Beto.
“Ini nai pidu nai pidu nai wali ku ampo na caru ndi ngaha ka!”. Cambe ba Ama Bengo.
“Ncihi cao nahu ma ngena wa’u woko taho kere ku e”. Nggahi wali Ama Bengo. Karu’u na nuntu na.
“Kabune ku lao ipa nami ke?” sodi wali ba Ama Beto.

“Kabune poda ku kamanae”. Cambe kai ba Ama Bengo. Ma labo nenti na tuta na ba ngupa na aka. Kabune ku loakai lao ipa Ama Beto ede? Sodi na weki ndaina. Samporo sawa’u kai ba ede. Nggahi lalo Ama Bengo.
“Ta ndawi mena mpa lopi karodo”.
“Io poda kamanae”. Nggahi Ama Beto. Batu na aka Ama Bengo.
“Ncihi cao mpa pidu nai ake, ndi sadia kai lopi korodo ede”. Nggahi wali Ama Beto. Karu’u na nuntu na.

Edempara Ama Beto ede. Ndawi lalo kai na mpara lopi karodo ede, pidu nai aima ngadi pidu nai aima rai. Lopi karodo ede, ededu ra ndawi ba lenga doho Ama Beto, ma ne’e lao batu ngaha jago ipa bae moti. Pahu ba eseakana Ama Beto ede. Ainaina ma ka pidu kai na. Lopi karodo ede na wa’u ra ndadi taho. Ndede wali ja kere Ama Bengo ede na wa’u ra woko ntika. Na loadu ndi ngemo rau kai.
“Na ndadi ku lao ngaha jago de Ama Bengo ro?”. Sodi ba Ama Beto. Wati da sabana.
“Na ndadiku ni!”. Cambe kai ba Ama Bengo, ma campo labo neo ade na ba waura woko taho kere na labo na kapahuru aka na ede.
“Na wa’u ra ndadi taho lopi karodo dero?”. Sodi mbali ba Ama Bengo.
“Aina ndi mimi kaina dei woha moti”. Nggahi wali Ama Bengo, ma sodi katenggo ade Ama Beto.
“Na wa’ura taho e!”.
“Na wa’ura ndadi taho e, wati wara ndi dahu wea kai ba mimi na”. Nggahi wali Ama Beto, cambe katenggona ade Ama Bengo ede.

Edempara ne’e mena kai na tu’u lao. Ba onena mboto lalo weki, wati inca ba lopi karodo ede. Wontu lalo eli Ama Beto. Eli ede, ededu wati kalao manggoma-ngoma. Baida gentena ma taho-taho (ma wati nggoma). Ba nggahi ndede Ama Beto ede. Lenga doho na mada batu ede, wara ma na’e nawa, wara wali ja ma nangi batu. Sa ndede ja mpa da kau wali kai batu.

Edempara loja lalo na lopi karodo ede. Wuana Ama Beto labo lenga doho na ma taho-taho (ma wati nggoma) kamboto wali ja ba Ama Bengo. Nggahi lalo Ama Beto aka Ama Bengo.
“Ba auku da ngemo kai mu Ama Bengo?”.
“Ka ngemo ka peade ni!”. Cambe ba Ama Bengo.
“Ngena wa’u ku woko taho ntika kere ke”. Nggahi wali Ama Bengo.

Loja lopi karodo ede na wa’u kalalona woha moti ma na’e ede. Dei ade ndede kai na ede. Ama Bengo na iuru loa na ngemo kai kere na ma wa’u ra woko mbali ro ntika ede. Dei ade ndede kai na ede. Mpa’a rawa lalo mpara Ama Bengo.
“Rai ka rai lopi karodo e. Na raka si ipa bae moti. Ka rinta kalea ku ba nahu lopi karodo”. Eli wua rawa Ama Bengo.
“He ianae, aina mpa’a la lone Ama Bengo e”. Nggahi Ama Beto. Ma dahu ade.
“Wati e ka mpa’a rawa ka e!”. Cambe kai ba Ama Bengo, ma campo labo hari na.
“Rai ka rai lopi karodo e. Na raka si ipa bae moti. Ka rinta kalea ku ba nahu lopi karodo”. Eli wua rawa ama bengo, maka dua  kali kaina.
“Aina mpa’a lalone kai rawi poda Ama Bengo e”. Wontu wali nggahi Ama Beto, ma naha ipi dahu.

Edempara rawa katolu kali kai ba Ama Bengo. Sawa’u ba rawa na maka tolu kali kaina ede. Rinta kalea poda lalo ba Ama Bengo lopi karode ede.
“Rai ka rai lopi karodo e. Na raka si ipa bae moti. Ka rinta kalea ku ba nahu lopi karodo”. Eli wua rawa ama bengo, maka tolu kali kai na. Sawatipu da rongga lopi karode ede ipa bae moti.
“Tou e”. Eli rinta kalea ba Ama Bengo lopi karodo ede. Sawa’u ba ede lao ngemo lalo ndai kese na Ama Bengo ede.

Edempara mimi sar’a lalo Ama Bengo, ma labo lenga doho na mara batu ncau na. Edempara lenga doho na ra kanta ncau kai batu ba ngoma-nggoma na. Mabali sana ade na badara lao batu mena na ngaha jago ma wati poda ede. Sia doho ma da ndadi lao batu ede, na rawa ka wua ku Ama Beto labo lenga doho na mimi ede. Ba Wa’ura boha ba sarente ama bengo, hampa sa mimi kai na.
“Koci paja ipa bae moti, poripo dara lao batuku”.
“Koci paja ipa bae moti, pori po dara lao batuku”. Ndede ku ruana wua rawa sia doho ma da ndadi batu.

Sapoda-poda kaina wati wara jago ipa bae moti aka. Lao ngaha jago ipa bae moti ede. Ededu ra kameta kaiba Ama Bengo aka Ama Beto. Wara kai kemeta ba Ama Bengo. Ededu ba na’e nawa na aka Ama Beto mara foco sara’a wea kerena.


Yogyakarta, (Asrama Bima/kamar 111)  12 Juni 2016
Penulis : Agus Salim / Agus Mechi Angi
Mahasiswa Sosiologi UIN Sunan Kalijaga Yogyakarta / Pemerhati Sosial pada Forum Intelektual Muda Ncera Yogyakarta (FIMNY).


Catatan:
Ceritera  ini merupakan dongeng pengantar tidur, yang sering diceritakan oleh orangtua (Ibu) penulis. Juga oleh orangtua pada umumnya. Cerita ini hidup dilingkungan masyarakata Bima, khususnya masyarakat Desa Ncera. Penulis hanya menulis ulang apa yang masih penulis ingat semenjak kecil. Karena pemilik sesungguhnya adalah orang tua dan nenek moyang, yang telah menceritakan kapada anak cucunya dengan sangat indah. Mengingat ceritera ini telah di ceritakan dari generasi ke generasi, penulis merasa perlu “mengabadikannya” dalam bentuk tulisan, dengan harapan dapat dibaca oleh generasi yang datang kemudian. Karena, didalamnya terdapat kekayaan pesan moral dalam kehidupan – yang belum sempat dilakukan pengkajian secara serius. Penulis menyadari bahwa dalam menulis ceritera ini terdapat perbedaan terkait teknik dalam menceritakannya, namun secara substansial tetaplah sama. Selain itu, sebelum menulis  ceritera ini penulis meminta pada teman-teman yang satu Daerah atau satu Desa untuk menyamakan substansi cerita, hal itu dilakukan diwaktu “nongkrong” bareng sembari mengenang masa kecil dengan dongeng-dongenya yang penuh pendidikan ‘moral hidup’ dan tetap menyenangkan.


Share this post :

Posting Komentar

Komentar netizen merupakan tanggapan pribadi, tidak mewakili kebijakan redaksi. Kami berhak mengubah atau menghapus komentar yang mengandung intimidasi, pelecehan, dan SARA.

 
Copyright © 2015-2018. PEWARTAnews.com - All Rights Reserved
Template Created by Creating Website